Resientemente, sr. Baudet, miembro di Tweede Kamer a hasi un komentario skandaloso di tipo rasistá den un reunion di Tweede Kamber, fortifikando idea i pensamentunan kolonial. Manera hopi hende, mi mes tambe a ekspresá mi indignashon via Facebook.
Ku plaser mi a mira ku nos Minister President tambe a reakshoná den un karta pa sekretario General sr. Szábo.
Mi ta uní, mi mes ku e intenshon i e señal ku e karta kier manda. Sinembargo, mi ta kere ku nos por a a hasi e respuesta mas fuerte. Mi ke kompartí tres punto importante ku lo a fortifiká nos mensahe:
1. Evitá redefiní nos status den Reino
Mi ta ripará ku tur biaha ta surgi nòmber nobo pa agrupá Kòrsou, Aruba i Sint Maarten, manera “paisnan CAS” òf “paisnan Karibeño.”
Aunke e por soná inofensivo, ta un moveshon sutíl ku por miná nos igualdat den Reino.
Nos ta paisnan den e Reino — igual manera Hulanda. Nos autonomia ta un logro ku a tuma hopi luchanan pa realisá, i nos mester sigui protehá esei, tambe den nos propio manera di referí na nos mes.
2. Involukrá Parlamento den respuesta
E respuesta lo a tabata mas fuerte si Parlamento di Kòrsou tambe ofisialmente a ekspresá su rechaso pa e ekspreshonnan hasí pa sr. Baudet.
Un karta firmá tanto pa Gobièrno, komo Parlamento lo a manda un mensahe kla ku nos ta uní, riba di partido òf ideologia.
Ademàs, otro siman, Komishon Reino di Tweede Kamer lo ta na Kòrsou. Esaki ta un oportunidad ideal pa pone e tema akí den e dialogo, na nivel mas altu.
3. Keda kuido nos presentashon
Mi a ripará ku tin algun fayo di gramátika den e teksto di e karta. Aunke minimal, na momento kunos ta eksigi respèt, kualke detaye, inkluso nos manera di skibi, ta kontá.
E komentario di sr. Baudet ta inakseptabel i ta konektá ku patronan kolonial ku nos a traha asina duru pa move for di dje.
P’esei, nos respuesta mester ta fuerte i uní. Respèt i igualdat den Reino no ta un regalo — ta fundamento ku nos relashon mester ta basa riba dje.
