Un biaha mas mester tuma nota ku e kredibilidat i integridat di
Fundashon Kas Popular (FKP) ta keda tachá.
Ta kon ta posibel ku e mesun eksponentenan di MFK, bou di e kapa di HD&M ku a haña un dil miyonario serka FKP, kier a haña kasnan na Rif gratis, awor tin maneho di e proyekto di ‘Mi Casa Ya’ i ta biaha rònt mundu den representashon di FKP i Kòrsou.
MFK mester ta kere ku pueblo di Kòrsou por keda fasilmente manipulá. Esta si no logra di Pariba, ta purbé di Pabou.E último 2 añanan ta un lista di akshon tin ku ta mustra kua ta e intenshonnan di MFK ku FKP.
Promé FKP kier a pasa kasnan di pueblo den área di Rif i besindario gratis pa eksponentenan di MFK. Ku un lucha tenas di un grupo di hende muhé di Rif, FKP a haña su mes tin ku kambia di posishon anto lihé.
Pa di dos a sigui e famoso karta, kaminda FKP ta pidi gobièrnu pa intermedia pa e mesun eksponente di MFK gana un mion florin. Ku un historia fabriká tokante Giro Settlement Holding. I awor ku ‘broche de oro’ a bin ku e famoso proyekto ‘Mi Casa Ya’, kaminda e mesun eksponente di MFK ta biaha, den representashon di FKP i gastando sèn di e pueblo rònt mundu.
For di e momento ku e sekuasnan di MFK a drenta den FKP, úniko kos ku nan a hasi ta saka probecho di FKP. Proyektonan fantasma ta keda inventá pa sigui paga e eksponentenan aki sén, sén di pueblo, destiná pa traha i drecha kas. Ta opvio ku e kompas moral di MFK ta dañá, pero kuantu mas pueblo di Kòrsou, mester sigui aseptá ku Fundashon Kas Popular i esnan den nesesidat di kas ta bira viktima di e situashon?
Suskrito ta hasi un apelashon na minister Cooper pa para e bagabunderia ku ta sosodiende den FKP di forma inmediato i ta eksigí pa saka e kompania HD&M di inmediato for di Fundashon Kas Popular, na bienestar di tur persona ku ta sklama pa un FKP transparente. FKP su tarea prinsipal mester ta e benefisio di pueblo di Kòrsou i no ‘playground’ pa yuda kompinchinan polítiko.
