E desishon di Korte tokante Plantashi Vetter ta habri un oportunidat pa e desaroyo di kasnan sosial na Kòrsou. Sra. Pauletta ta kompartí e opinion di korte ku e terenonan aki, mester kedadediká na konstrukshon di kasnan sosial. E intenshon sí di Korte, pa duna e plantashi Vetter densu totalidat na Fundashon Kas Popular (FKP), sra. Pauletta ta di opinion ku FKP no tin e kapasidat finansiero, organisatorio i atministrativo pa enkargá su mes ku un proyekto asina aki.
Falta di transparensia:
Durante e último 12 añanan, FKP no a publiká ningun kuenta anual, ni a duna kuenta i rason di su estado finansiero. Esaki ta kontra prinsipionan di Corporate Governance, lokual korte ta eksigí di kualke organisashon ku kier bin na remarke pa manehá e tereno di Vetter. E echo ku estado finansiero di FKP ta deskonosí ta lanta kuestionamente tokante e kapasidat finansiero di e fundashon pa desaroyá un proyekto di e grandura di plantashi Vetter. Sigur si korte ta trese dilanti ku ta importante pa evitá ‘faillissement’ di kualke entidat hurídiko ku ta bai asumí e tareanan.
Gobièrnu no tin bista riba FKP:
Na aña 2021 Gobièrnu i FKP a firma un kontrato di maneho di e kasnan di pueblo. Den e kontrato FKP mester a kumpli entre otro ku duna klaridat tokante e maneho di e kasnan. FKP no a kumpli ku e akuerdonan deskibrí den e kontrato. Lokual a resultá ku den aña 2025 i 2026 stòp parti di e fondonan destiná pa FKP . Ta klaro ku FKP no por duna abase di e kontrato klaridat riba patrimonio ku a keda poné bou di su maneho, ta kon por garantisá ku e lo por duna klaridat riba kualke proyekto nobo?.
FKP semper a pidi gobièrnu asistensia pa konstrukshon di bibienda sosial:
Fundashon Kas Popular ta hasi uso di fondo i tereno di gobièrnu pa konstruí kasnan sosial. Proyektonan manera Sapate i tera Kòrá a keda konstruí ku fondonan públiko. Durante e kaso di Vetter, FKP mes ta indiká di lo mester bende parti di e tereno, pa e por tin fondo pa konstrukshon di kasnan sosial. Esaki ta un preokupashon adishonal, paso no tin un bista ta kuantu di e tereno di plantashin Vetter, FKP lo mester destiná pa benta komersial pa asina e por konstruí kasnan sosial.
Sra. Pauletta ta konsiente di e nesesidat pa repartí e tereno di plantashi Vetter i tambe e konstrukshon di kasnan sosial adishonal. Kasnan sosial ta un di e nesesidatnan básiko di nos komunidat. Presis pa e motibu aki, mester un instituto ku ta transparante, ku ta duna kuenta i rason i ku por inspirá konfiansa pa manehá esaki. FKP a demostrá ku e no tin e kapasidat pa karga e responsabilidat aki. E responsabilidat awor ta den man di gobièrnu, pa asumí e enkargo di plantashi Vetter, dor di segurá ku e habitantenan aktual ta haña loke nan meresé i sigui desaroyá e otro terenonan pa konstrukshon di kasnan pagabel.
