Riba petishon di habitantenan di Otrobanda, sra. Ana Maria Pauletta a organisá un enkuentro pa papia tokante e tópiko di ‘Bibienda’. E enkuentro aki a tuma lugá djaweps último, na Sentro di bario Otrobanda.
Durante e enkuentro e habitantenan di Otrobanda a trese nan preokupashonnan pa ku bibienda dilanti. Hopi di e kehonan ku a bin dilanti ta trata spesífikamente e maneho di Fundashon Kas Popular. Algun di e kehonan ku a bin dilanti ta:
- Falta di kasnan pagabel pa hür
- Hopi falta di mantenshon di kasnan di gobièrnu
- E sistema di punto di FKP ku no ta funshoná
- Diferente fayo den komunikashon pa ku FKP
Bibienda ta un di e nesesidatnan básiko pa e ser humano. Ta un pais su responsabilidat pa tin un maneho di bibienda ku ta inkluí tur grupo. Falta di akseso na un kas pagabel, biba den kas ku falta di mantenshon i miedu konstante pa keda saká for di kas ta desaroyonan sosial ku mester keda atendé. Komo pais Kòrsou ta invertí 12 mion tur aña pa entre otro mantenshon di e kasnan sosial i supsidio di hür. Ademas pais Kòrsou ta traha huntu ku FKP pa konstrukshon di kasnan pagabel. Pero e maneho aki, aparentemente no ta sufisiente i/òf no ta esun korekto.
Sra. Pauletta ta dedusí for di e enkuentro i tambe kombersashon ku mester bin ku un maneho nobo, pa ku bibienda. E sistema di punto di FKP i su ehekushon a bira opsoleto. Lòs for di e echo ku ta tarda añanan promé ku un persona haña e kantidat di punto nesesario pa yega na un kas, ora e persona yega na e puntonan tòg no tin kas disponibel. Mantenshon di kas tambe ta un problema pa FKP. FKP a demostrá di no por inverí sufisiente, pa mantené e kasnan na un manera debido.
Ya kaba sra. Pauletta a haña petishon pa organisá e enkuentro den otro barionan. Durante e próksimo simannan sra. Pauletta lo sigui hiba e kombersashon i enkuentronan aki. Mientras tantu tambe lo sali diferente karta pa FKP i SOAW pa ku e situashonnan agudo ku ta bini dilanti durante e enkuentronan.
