Djasabra último, 30 hóben a risibí nan sertifikado komo promo girl/boy for di man di Alysha Winter den e proyekto “Vakantie Job 2024 ku Ciprés”.
Un proyekto kaminda e kompania Ciprés, ku un sosten total di sra. Ana Maria Pauletta a duna 30 hóben e oportunidat pa durante fakansi yega na nan propio entrada. Durante 21 dia, e hóbennan a partisipá na e proyekto. Nan a siña téknika di benta i presentashon. Despues di un training intensivo di Gino di The Change Foundation e hóbennan aki a subi kaya, pa bende e krema Ciprés. Nan a hasi esaki ku determinashon i fervor.
Esaki ta di dos biaha ku sra. Alysha Winter ta organisá ku éksito, e proyekto aki. E meta prinsipal di e proyekto ta stimulá hóbennan pa alkansá nan meta ku un outo-estima haltu i krea bou di e hóbennan e konsiensia di nan propio potenshal.
E tim di organisashon, enkabesá pa Alysha lo kier gradisí tur sponsor ku a kontribuí na e éksito di e proyekto “Vakantie Job 2024 ku Ciprés”. Tambe Alysha lo kier felisitá e hóben Richainely Frans, ku a resultá e hóben ku mas a bende. Richainely a risibí un premio adishonal di fl. 1000,- . Un pabien na tur e hóbennan ku nan logro.
Pa aña 2025 e proyekto lo bira mas grandi i ku mas hóben. Nos ta pidi tur hóben pa keda pendiente pa e siguiente “Vakantie Job ku Ciprés”.
