Minister Larmonie kier usa Parlamento komo eksusa pa pone e rapòrt trahá huntu ku TNO den kuadro di landspaket, despues di un aña den lachi, un banda.
E raport ‘Sociale Zekerheid en Sociale Voorziening Curacao’, a keda un aña den lachi di minister Larmonie, sin ku el a yega parlamento. Apesar ku Parlamento na diferente okashon a hasi pregunta tokante e topiko di seguridat sosial entre kual AOV.
Parlamento a trata presupuesto 2024 tantu den komishon sentral i públiko, tòg no a fasilitá Parlamento e raport aki. Lokual si a sosodé ta ku ministerio di SOAW a reservá 1.8 mion florin pa un subida eventual di e kompensashon banda di AOV, abase di e rapòrt aki.
Den mart 2024 frakshon di PAR a pidi un reunion riba e topiko di AOV, kaminda minister a indika di no lo indeksá e montante di AOV. Durante e reunion aki, tampoko minister no a fasilitá Parlamento e rapòrt aki. Apesar di preguntanan ku a keda hasí.
Aparentemente despues ku sekretario di estado saliente sra. Van Huffeken a mustra kritika riba e falta di akshon di gabinete Pisas, e rapòrt aki a keda publiká lihé lihé. Okashonando asina aki un preoukupashon enorme bou di diferente grupo, entre otro e penshonadonan. Ta di lamentá ku ta asina aki ta trata tópikonan, ku ta asina importante pa nos komunidat.
