Ku plaser nos ta informá ku e proyekto #kòrsoulimpi, durante e periodo di Karnaval 2024, tabata un éksito rotundo. Durante último 3 aña sra. Ana Maria Pauletta a inisiá e proyekto pa konsientisá komunidat di Kòrsou tokante e problemátika di sushedat i e benefisionan di resiklahe.
Den kuadro di esaki a nase e proyekto #kòrsoulimpi i durante di e temporada di karnaval 2024, esaki a keda ekstendé ku un Karnaval Limpi. Durante e periodo di karnaval ku a terminá ayera, diferente grupo di karnaval di mucha i adulto a risibí paketenan di saku di sushi. Gruponan a risibí e inisiativa ku man habri.
Tambe den koperashon ku Radio Krioyo, djaweps promé ku marcha di tiner. Sra. Pauletta i e tim di #kòrsoulimpi a subi Rooseveltweg pa parti saku di sushi pa outomobilistanan, ku e petishon pa tene nos Karnaval limpi.
I komo akshon final pa e temporada di karnaval 2024 e tim di #kòrsoulimpi a uni ku Green&Clean Curacao NOW riba e ruta, promé ku marcha di adulto, pa parti saku di sushi. Tabata un plaser pa wak kon e personanan ku tabata wardando karnaval yega a risibí e sakunan ku man habri i realmente a demostrá nan apresio i kompromiso dor di mesora kuminsá hasi uso di e sakunan.
En total, huntu, a parti mas ku 3000 saku di sushi, loke ta yena e tim di #kòrsoulimpi ku satisfakshon i plaser. Sumamente agradesido ku nos por a kontribuí na un Karnaval mas limpi. I keda pendiente, pasombra e tim di kòrsoulimpi lo tin mas akshon den kuadro di tene nos pais limpi na kaminda !!
