Durante tratamentu di presupuesto 2024, PAR a presentá un moshon pa subi tur penshonado di AOV su penshon, riba e base di e 1.8 mion ku tin reservá. Apesar ku miembronan di koalishon a firma e moshon, nan a vota kontra di dje. Ku konsekuensia ku e moshon aki no a keda aprobá.
Minister Larmonie a indiká di lo keda mantené su posishon ku solamente penshonadonan ku ta risibí AOV lo por bini na remarke pa e subida adishonal. Lagando asina aki un grupo grandísimo di persona afó, personanan ku tambe ta biba bou di e mínimo di pobresa. Ademas sra. Larmonie a bisa ku e lei di AOV ta evitá ku por indeksá e penshon i p’esei durante e próksimo añanan lo no indeksá e penshun tampoko.
Frakshon di PAR ta di opinion ku e tema aki ta demasiado grandi pa trata solamente durante di tratamentu di presupuesto. Komo Parlamento nos mester hiba un diskushon amplio tokante AOV i e desishonnan ku Gobièrnu a i ta tuma pa ku AOV. Total 51.000 persona ta kobra AOV, esaki ta algu mas ku un terser parti di nos komunidat. Meskos ku tin un bista pa ku subida di ònderstant, subida di salario mínimo, nos mester krea un plan di akshon pa ku tur hende ku ta kobra AOV, sin importá ku nan tin 1 òf mas penshun.
Parlamento djamars, dia 5 di mart lo deliberá ku sra. Larmonie riba e tópiko aki, pa asina formulá un direkshon ku ta inkluí tur hende ku ta kobra AOV i no un grupo so.
