Awe frakshon di PAR a entregá un proyekto di lei na Parlamento di Kòrsou. Ku e proyekto di lei aki, e frakshon ta trese kambio den dos lei: 1. Landsverordening houdende wijziging van de Verordening van den 13den september 1918, houdende bepalingenbetreffende de verklaringen van overlijden, af te geven door de geneeskundigen in de kolonie Curacao’ i 2. ‘Burgerlijk Wetboek;
For di aña 2020, parlamentario sra. Pauletta ta duna asistensia i atenshon na mayornan ku a pèrdè nan baby durante embaraso òf na momento di parto. Ta hopi ta e mayornan ku lamentablemente ta tuma nota ku e akta ku ta registrá nan yu sin bida, no tin e nòmber ku nan a pensa di duna nan yu. Si nò, simplemente ‘levenloos geboren’. Esaki ta un doló èkstra, banda di e doló inmenso di a pèrdè nan yu.
Den kuadro di esaki, sra. Pauletta, den dos okashon diferente a kompañá mayornan pa defendé nan derecho, pa registrá e nòmber di nan yu, ku éksito den korte. E kaso di Imani van Wilgen a habri un porta pa hopi otro mayor, ku tabata karga ku mesun deseo. Apesar di e éksito di mayornan den korte, no ta deseabel pa mantené esaki komo un kustumber.
Den kuadro di esaki e parlamentario a inisiá e proseso pa kambia e lei. Kariñosamente yamá lei di Imani. E lei su kontenido ta pa kambia e formulario ku ta keda usá pa registrá e fayesementu di e baby. Dùs ku e kambio aki, for di un inisio, mayornan ku ta deseá por duna nan baby nòmber i fam. Dòkternan ku ta konstatá fayesementu por nota e nòmber mesora. Esaki ta bai evitá ku Kranshi ta traha e akta sin nòmber. Ademas den lei, lo adaptá e echo ku un tata no por rekonosé su yu, si esaki a nase sin bida.
Pèrdida di un baby, ta un doló inigualabel. Difísil pa komprondé, si bo mes no a pasa aden. Pa frakshon di PAR esaki ta un inisiativa di lei ku ta duna honor na e nesesidatnan di nos mayornan i ta kumpli ku nos deber komo representante di e pueblo aki. E frakshon ta spera ku e lei lo ta kla pa tratamentu den Parlamentu, promé ku 15 di òktober, ku ta dia ku mundu ta rekordá tur baby ku a bai muchu tempran.
